Die verskil is!

My tydjie in Johannesburg was soos gewoonlik weer kort maar ek het darem tyd gemaak om kwaliteit tyd saam met my kinders te spandeer. ‘n Mens se legacy is nou maar net een maal jou kinders, en ek het twee van die bestes wat daar is!

Wian, ondeund en hiperaktief en met ogies wat jou hart laat smelt voor jy nog kan dink jy is kwaad vir hom, en dan is daar Janine, beeldskoon en met ‘n volwassenheid wat jou onverwags sal betrap.

Hulle is werklik twee kinders om op trots te wees en dit is presies wat ek is.

My tydjie in Johannesburg het my net opnuut weer laat besef ek is, ten spyte van die feit dat my kinders daar bly, klaar met daai plek.

Dis so ‘n ander gevoel waarmee ek vandag op die lughawe geland het, meesal ‘n gevoel van verligting… moenie my verkeerd verstaan nie, ek weet waar is my roots, en nee die Kaap is by verre nie volmaak nie, maar dis vir my volmaak, presies wat ek wil he en waar ek wil oud word en waar ek wil bly vir nou.

Ja die Kapenaars lewe op ‘n ander planeet, nee hulle kan nie kar bestuur nie en hulle is totaal onvoorbereid vir dit wat in die land gebeur, maar hulle is vriendelik, by verre nie so opgestress soos die res van die land nie en hulle is rustig en naief, en aanpasbaar, en druk nie om elke hoek en draai ‘n middelvinger in jou gesig nie!

Die Kapenaars leer nie hulle kinders van die gevare van die land nie en ook nie van besigheid nie, maar dis juis daai onskuld wat my bekoor, en hulle het goeie maniere… wel die wat ek ken ten minste!

Dis naweek en daar le ‘n golfgame, die eerste in meer as n jaar vir my en wag die naweek, by Erinvale nogal, en natuurlik baie rugby, die WP/Sharks en dan die klein wedstrydjie tussen die Bokke en die All Blacks in Soweto!

Dit gaan ‘n lekker naweek wees, ek het soveel om na uit te sien….. en dankbaar te wees! Geniet joune!

Wimpie

This entry was posted in Uncategorized. Bookmark the permalink.

Comments are closed.